يوم جميل في قرية صغيرة

25.09.07 22:39

السلام عليكم انا رح حاول اوصفلكون قرية صغيرة انا عايش فيها بالشام واسمها جديدة عرطوز(البلد)
يا اعزائي جديدة عرطوز بتبعد عن دشمق حولي ال 15 كم يعني مو كتير بعيدو بتاخد معاك شي تلت ساعة بالسرفيس هي اذا الله يسرلك امورك ولقيت سرفيس بسرعة (وهي مستحيلة ) وركبيت لحالك بالمقعد الواحد يعني ابعادة بيعد على حضنك شي 3 4 اشخاص من الاخوة العراقيين ( الله يديمهن ) ركبت وحاسبت عن حالك وعن شي 2 طالعين سلبطة وما دفعو والشوفير تنح ما بيمشي غير لحتا يصلو كل حسابو ( حقو )
ما علينا رح بلشلكن باول النهار
انت فقت هيك والله رضيان عليك على صلاة الصبح على صوت رصاص جاي من الجبل الظاهر علقانة بين الجمارك والمهربين اخي كلو ما علينا امت توضيت وصليت وحبيت تفتح الشباك تشملك هيك شوية هوا نضيف يعني الصبحيات بكون الجو حلو وانت بتفتح هالشباك او الباب بتهفلك ريحة حرق زبل المداجن عن الصبح يا ستار شي بيقطع النسل الله وكيلكن
انتزع مراقك وقلت لحالك لارجع نملي شوي بعد شوية تقلبات في التخت وشوية قران لحتى تهدي نفسك غفلتلك ساعتين يعني صارت الساعة شي 8.30 او9.00 بتنط من اربعتك الكهربا مقطوعة وبدها شي ساعتين لحتى تجي بتفيق عرقك مرقك وعم تكفر بالعبري سيدي امرك لالله سفقت وغسلت وشك بمية الصهريج يلي ضليت مبارح شي 3 ساعات م تترجى الزلمة لحتى ابل يعبيلك مي بما انو المي مقطوعة صرله شي 3 شهور وما بعطوك دورك الا بش 300 ل س ما علينا وين وصلنا اي غسلت وشك وحلقت دقنك وعقمت وشك مشان ما تتحسس ومرو الساعتين متل فراق الولدين بدون كهرا وهة اجت الكهربا وبلشت الناس والمحلات بشغله عمي بدون يتسببو انت بهالاثناء حبيت تشربلك فنحان قهوة مع سجارة لحتى تنسى تعكيرت هالمزاج والله ما كزبت خبر ساويت هالقهوة وقعدت على هالبرندة ويلا بلشت المناشر والحدادة وطرق الازاميل والكمريسات تشتغل يعني بتحس حالك قاعد بالمنطقة الصناعية بعدرا يمكن هنيك ارحم خيو صار الضهر توضيت وصليت وتغديت وطبعا من دون شك نومت الضهر بدك تنساها خيو الوقت طويل شو بدك تساوي مالك الا تروح على شي كفي نت لانو معلومك الانترنت بالبيت شي بشهي يعني ولا ال ADSL شو هالحكي مافي كلام خيو رحت على الكوفي بعد دوارة شي ساعتين لحتى لقيت واحد فيو شي 2 بس عم يستنو دورون الله هيك من عالي سماه يسرلك ياها وقعدت بتلاقي المسنجر ما شغال شي وقفو الفيرجن (النسخة)شي الكيبورد مو شغال
شي وش صاحب الكوفي بيفسي وعامل حالو لابل الله بمفرق والساعة عندو ب 40 ل س ودايما بياخد 10 ليرات لقدام مشان الحلال والحرام يعني بدك تحط باعتبارك انو الساعة ب50 ل س حكيت وخلصت مع شوية معاناة
ورجعت على البيت لبست وهندزت حالك وحبيت تطلع تتمشى انت والشاب بتقول لابوك بدي مصاري بعد شي ساعة مداولة انت وابوك بيعطيك شي 50 ليرة
خيو ما علينا طلعت تتمشى شوي ولا بيطلع بوشك انو جديدة عرطوز حولوها لبغدا جديدة يعني الناس يلي بالشارع عراقية المحلات عراقية النسوان عراقية لك حتى الخبز عراقي والهوا عراقي لعن اخت هالسهرة ورجعت على البيت بنطلك ابوك وبيقك وين لهلأ يا وسخ عم اصرف عليك على الفاضي روح لاقيلك شغلة واشتغلها بتحط راسك وبتنام وانت عم تلعن الساعة يلي اجيت فيها على هالدنيا
خير انشاء الله
هاد احلى يوم بجديدة عرطوز قضيتو بحياتي واتمناكم تجو اهل الفرقلس كلياتكون وتزورونا
بتنورو والله

26.09.07 0:10

الله يعينكم
العراقية غزو الدنيا كلها
بس شو طالع بل الايد
مشكور على مرورك الطيب

26.09.07 17:21

هههههههههههههه

و الله ضحكتني يا ابو النور
و طيبة الله

27.09.07 0:19

على راسي والله
احلى شباب
ومشكورين على المرور

27.09.07 17:08

السلام عايكم
الله يعينكم ويساعدكم
ياخي الفرقلس جنة
لعند<جديدة عرطوز>

27.09.07 22:33

يا رجل هاي المأساة العرطوزية

يا اخي و الله عيب على العراقيه يتركو بيوتون و يجو لعنى
و بتلاقي كل واحد لوح ما شاء الله .... يعني بدك صينية زرقة مو خرزة زرقة ترد عنه العين
يعني اذا بيميل على الحيط بيهده

يروح يهدله شوية مع الشباب هنيك

بتوقع الشام بشكل عام كلها نفس القصة

اذا بتعرف دف الشوك مليح
و اذا ما بتعرفها بس اعمل استبدال للنص السابق بدل كلمة جديدة عرطوز كلمة دف الشوك

و اسأل مجد
lol!

28.09.07 0:58

يا عمي الله بيعين والا ما يجي يوم وتنفرج فيه هلاحوال
مع العلم انو جديدة عرطوز فيها واحد من اهل البلد بمجلس الشعب وابن عمو بمجلس المحافظة بس يلا النا الجنة خيو
ومشكورين على المرور